ذكرنا بمقالة سابقة ان اختبارات سرعة الاجهزة هي عبارة عن كذبة وشرحنا ليش هن اختبارات خاطئه وبالخلاصة ذكرنا انو الطريقة الامثل لقياس سرعة الهواتف هو عن طريق ال Benchmarks اذاً ماهو البينش مارك وهل هو فعلاً الاختبار الامثل لقياس سرعة الهواتف؟
الشيء الذي تبحث عنه الناس هو كيف يكون اداء الهاتف في الحياة الواقعية مقارنة بجهاز اخر ليختار افضل جهاز مناسب لميزانيته لكن في البداية يجب ان نفهم ماهو اداء الهاتف في الحياة الواقعية؟ لان طريقة استخدام شخص لجهازه تكون مختلفة عن شخص اخر تماماً ربما احدهم يستخدم جهازه لتصفح وسائل التواصل الاجتماعي واجراء المكالمات والتقاط الصور لكن الشخص الاخر يتجه نحو استخدام هاتفه ك منصة العاب وربما شخص اخر يستخدم هاتفه من اجل اجراء المكالمات فقط فهو غير مهتم بمواقع التواصل الاجتماعي نهائياً وربما هنالك شخص يستخدم هاتفه لسماع الموسيقى فقط وهنالك شخص مزيج من كل هؤلاء الاشخاص. اذا ماهو اداء الهاتف الحقيقي؟ في الحقيقة لا يوجد مقياس ل اداء الهاتف الحقيقي نهائياً بسبب اختلاف طرق استخدام الهاتف من شخص الى اخر.
لكن السؤال نكدر ناخذ شوية من كل انواع استخدام الاشخاص لموبايلاتهم وندمجها سوية حتى نطلع نتيجة؟ الجواب اي! اسم هل شي بينش مارك (Benchmark) هذا هو البينش مارك ببساطة برنامج ياخذ عمليات نسويها بموبايلنا ويسويهن تلقائياً عدة مرات وينطينا نتيجة نكدر نقارنها ويه نتائج نفس البرنامج بغير اجهزة ونختار الجهاز الامثل النا.
انواع البينش مارك (Benchmarks):
– اكو نوعين اله نوع يختبر اداء وحدة المعالجة المركزية يسمى CPU benchmark
– النوع الثاني يختبر اداء معالج الرسوميات يسمى GPU benchmark
النوعين هذني منفصلات بشكل كامل ولازم يبقن منفصلات حتى تختار الجهاز الامثل لاستخدامك اذا انت مهتم ب العاب الفديو على جهازك راح تهتم ب اداء معالج الرسوميات لكن اذا كان استخدامك للهاتف هو تصفح واعمال مكتبية ف اداء وحدة المعالجة المركزية هو اللي راح يهمك. اكو برامج تدمج الاختبارين سويه مثل برنامج AnTuTu لكن بالنسبة لكثير من التقنيين يفضلون يشوفون الاختبارات منفصلة حتى يعرف شنو نقاط قوة وضعف الجهاز مقارنة بالاخر.
ليش الناس ما يوثقون ب البينش مارك (Benchmarks)؟
–هذا يجي لسببين الاول هو مقارنة اداء وحدة المعالجة المركزية مع التعامل مع واجهة المستخدم (User interface UI) لمن تتنقل بالجهاز او تضغط على خيار و شلون الجهاز يتصفح ويتنقل ف اذا جان هذا بطيئ راح يكول انو المعالج مال هل موبايل مو زين بس بالحقيقة هل شي ما اله علاقة بالمعالج بكد ما اله علاقة ب ال (UI) اذا كان بطيئ هذه مشكلة بتصميم الواجهة والتطبيق وليست بالمعالج.
–السبب الثاني انو بعض شركات الموبايلات بالماضي غشت البينش مارك (Benchmarks) دفعت فلوس لاصحاب تطبيقات الاختبارات حتى تنطيها نتائج افضل فلهذا الناس راحت ثقتها ب البينش مارك واعتبرته كله كذب لكن بالحقيقة انو الطريقة الوحيدة انك عرفت انو هم يغشون لمن انكشفوا ودائماً راح يتم كشفهم لان ببساطة اذا اجراء فحص البينش مارك ع غير تطبيقات راح ينطني نتائج كلش مختلفة وبأستخدام نسبة معايرة محددة الكل يكدر يعرف اذا كانت الشركة تغش او لا ف الشركات بطلت هل سالفة بسبب سهولة اكتشاف الغش هذا من قبل التقنيين.
الخلاصة:
اختبارات البينش مارك هي تعتبر الطريقة الامثل والاقرب للحقيقة لاختبار اداء الهواتف وكفاءة المعالج و وحدة الرسوميات لكن عليك ان تفهم ان تصميم التطبيق السيء او واجهة مستخدم سيئه لاتعني ان المعالج سيء او نتائج البينش مارك خاطئة.
