مشكلة الانترنت بالعراق و ضعفه هو أمر غير مخفي عن الجميع فهو يؤثر على المستخدمين بصورة مباشرة الي هم الناس الي دا تدفع أسعار اشتراكات مبالغ بيها بشكل كلش جبير مقابل اسوء خدمة انترنت بالعالم.
للمقارنة اشتراك انترنت بسرعة 1 كيكابت (يعني تفتح موقع fast يطلع لك سرعة نتك 1000 ميكابت) هو يتراوح بين ال 50 الى 100 دولار شهرياً في الولايات المتحدة و بالمملكة المتحدة سعر اشتراك الكيكابت حوالي 135 باوند.
هل شي يوصلنا لسؤال عن منو السبب؟
ليش الانترنت بطيئ بالعراق:
عدنا 4 محاور لبطئ الانترنت أولها الحكومة المتمثلة بـ وزارة الاتصالات والهيئات الي تمنح التراخيص للاتصالات وغيرها, ثانياً شركات الانترنيت الي متمثلة بالشركات الي تزود الانترنيت, ثالثاً اصحاب الابراج الي هم الوسيط بين شركة الاتصالات والمستهلك رابعاً هو المستهلك نفسه.
وقبل ما نبدي نحب ننوه انو احنا مدا نعمم هل كلام على الجميع ومدا نقصد أحد بالتحديد.
المحور الأول الدولة:
اول شي لازم نتعرف على مصطلح اسمه الـ لامدا, الي هي تعادل 10 كيكابايت. سرعة الانترنت بمواقع الفحص تطلع لك بـ البت مو البايت, كل 1 بايت = 8 بت ف يعني 1 ميكابايت = 8 ميكابت ولتسهيل الموضوع راح نحجي بالبايت فقط مانجيب طاري البت.
الدولة تبيع الـ لامدا الوحدة بسعر خيالي يوصل إلى 750 الف دولار امريكي بالشهر! معناها سعر الميكابايت الوحدة على الشركة يوصل إلى 75 دولار امريكي بالشهر.
(يعني لمن تفتح موقع Fast ويطلع لك سرعة الانترنت 8 ميكابت يعني الشركة دافعة 75 دولار علمودها!)
للمقارنة بكردستان سعر الميكابايت الوحدة على الشركات يتراوح بين 10 إلى 15 دولار وبتركيا سعر الميكابايت على الشركات بـ 5 دولار أمريكي فقط.
زين ليش الدولة دا تاخذ هيج مبالغ جبير؟
الدولة تكول انها تحتاج هل فلوس حتى تطور البنى التحتية لمنظومة الاتصالات من كيبلات ضوئية وغيرها وهل امور تحتاج صرفيات عالية حتى تتم.
زين ليش الدولة بعدها ما مطورة هل بنى كل هل سنين؟
ما يحتاج نكول تعرفون.
المحور الثاني شركات الاتصالات:
شركات الاتصالات دا تدفع للدولة هيج مبالغ ضخمة على سعات الانترنت زين شلون تطلع فلوسها؟ لان اذا نجي سعر الاشتراك ابو الـ 35 ألف الشركات تبيعه من 13 الى 17 دولار أمريكي على أبو البرج والباقي ربح لأبو البرج. زين اذا الشركة دا تشتري الميكابايت بـ 75 دولار شلون انت تحصلها بيوزر سعره 13 دولار؟
بعض الشركات بهل حالة اتجهت لعدة طرق حتى تعوض خسارتها واحدة منهن أنها تشتري بعض السعات الي تحتاجها من الدولة وتشتري النص الثاني من كردستان أو من تركيا أو تأخذ السعات عن طريق كيبلات قديمة متروكة من الدولة وهو هذا الشي الي اسمه (تهريب السعات) أي سعة انترنت تستخدمها الشركات بدون المرور بوزارة الاتصالات.
طريقة ثانية اتبعتها بعض الشركات هي مشاركة السعات يعني انت وفد 4 مشتركين وياك تتشاركون مثلا بهل ميكابايت الوحدة ولهذا السبب الفجر النت يسرع لأن جيرانك ناموا :”)
طريقة ثالثة اتبعتها بعض الشركات هي سيرفرات الكاش الي هي بالأحرى الانترنت الوهمي ببساطة بعض الشركات تخزن فيديوهات اليوتيوب وخدمات هوااي ثانية على سيرفراتها فبدل ما تستعمل سعات انترنت دولية حتى تشوف الفديو انت دا تشوفه داخلياً من سيرفر الشركة الي موجود بالعراق.
المحور الثالث اصحاب الابراج:
مشكلة ضعف النت بسبب بعض أصحاب الأبراج تتمثل بهواي محاور أولها استخدام بعض أصحاب الأبراج لأجهزة قديمة ومستهلكة وبالعادة يشترون أجهزة مستعملة من الصناعة أو عدم خبرة صاحب البرج بتنصيب الأجهزة والمعدات أو سوء التبريد للأجهزة أو عدم تبديل كيبلات البرج لفترات طويلة وشراء كيبلات ذات سعر منخفض لتقليل التكلفة و واحد من أهم المشاكل هو تنصيب الأبراج بشكل غير مدروس نهائياً بحيث صار برج بصف برج بصف برج و أشارة تتداخل بالثانية وشي تشوش على شي بحيث وصلت الضوضاء (النويز) بالجو إلى مستويات مرعبة ماتنفع نهائياً للبث. وشي اخير هو تحميل البرج فوق طاقته من المشتركين ف يحمل الأجهزة القديمة والمستعملة الي جايبها أضعاف طاقتها الي حددوها الها من جانت جديدة!
المحور الرابع المستخدم:
بعد ما غطينا مشاكل ضعف الإنترنت بسبب الدولة و الشركة المجهزة و صاحب البرج ننهي المقالة بالمستخدم نفسه. أسباب ضعف الإنترنت بسبب المستخدم هي محدودة تتمثل بـ جهاز استقبال قديم ومنتهي الصلاحية, جهاز بث قديم ومنتهي الصلاحية, كيبل قديم ومنتهي الصلاحية, سوء تبريد جهاز البث, طريقة تثبيت جهاز الاستقبال سيئة ويتحرك ويه الهوه وآخرها شراء اشتراك لا يتناسب مع عدد المستخدمين.
