هم ملاحظين انو شركة أبل ابد ما تحجي على منتجات منافسيهم ولا تقارن اجهزتها بيهم؟ بحيث ماتشوف ابل تحجي كلمة وحدة عن المنافسين الموجودين مثل سامسونك وغيرها لا على موقعها ولا بمؤتمر الاطلاق مال اجهزتها ولا حتى بالاعلانات الترويجية مالتها بهل مقالة راح نشرح الكم ليش.
مقارنة منتجك بمنتج المنافس مالتك هي اسهل و اوضح طريقة تسويقية موجودة بالعالم الكل يسويها بالتأكيد كلنا شفنا اعلانات سامسونك من تستهزا بالنوتج مال اجهزة الايفون مثلاً واغلب شركات الموبايل تقارن منتجاتها بباقي الشركات مبين شي واضح الصراحة انك تبين للناس شلون منتجك او جهازك افضل من جهاز المنافس حتى تقنعهم يشترون جهازك لكن أبل امبراطورة التسويق ماتسوي هل شي ابد.
بحيث الشركة لمن تريد تقارن جهازها الجديد تقارنه باصدار ايفون اقدم منه او تقارنه بشي ثاني مثلا تقارن كامرة جهازها بكامرة احترامية للتصوير DSLR بحيث الشركة تحسسك انو هي ترفض تعترف بباقي الشركات الي تنافسها الامر يبين غريب بالبداية بس بالنسبة لأبل الامر واضح جداً.
المقارنة ببساطة انك تجيب جهازين وتكول انو هذا الجهاز افضل من غيره بهل ناحية بمقدار هلكد بس بنفس الوكت تسوي ارتباط بأنو هذني الجهازين هن متشابهات لدرجة بحيث تكدر تقارن بينهن وانت ك مستخدم كدامك هل جهازين تختار واحد منهن بس شركة أبل حسب سياسة تسويقها
ماتريد المستخدم يفكر أي جهاز اشتري؟ تريده يفكر أي ايفون اشتري؟
اذا تلاحظ انو باقي شركات الهواتف تحب تقارن اجهزتها باجهزة الايفون ابسط مثال سامسونك و هواوي لان هل شي منطقي جداً بالنسبة الهم بما انو مواصفات اجهزتها مرات توصل اضعاف المواصفات الي تقدمها ابل بالاضافة الى انو هي من تقارن بهل طريقة هي ببساطة تحصل تسويق مجاني بواسطة أسم ماركة أبل الي أبل صرفت مليارات حتى تسوي هل ماركة، بنفس الوكت تلاحظ انو سامسونك تسوي نفس هل فكرة هي تقارن نفسها بأجهزة شركة أبل وتعتبر باقي الشركات ماموجودة بحيث تريدك تختار بين ايفون او سامسونك مو بين غير اجهزة و باقي شركات الاجهزة تسوي نفس الشي.
السبب الثاني ليش أبل ماتقارن نفسها بباقي الشركات انو المقارنة تشتغل بس لمن انت منتجك افضل من منتج منافسك بس اذا تقرة مواصفات جهاز ايفون وتقارنها بجهاز اندرويد راح تحس انو هل جهازين جايات من اجيال مختلفة و أبل تخسر بكلشي ضد باقي الاجهزة ببساطة هاي مقارنة بين ال Iphone 10s max و ال huawei mate 20 pro
الابتعاد من هل نوع من المقارنات يسمح لأبل انو تبتعد من سباق المواصفات حتى تركز على شلون الجهاز يشتغل بهل مواصفات بدل من انو تحط اعلى المواصفات الممكنة حتى تنتج جهاز مصمم بشكل جيد ومضبط من ناحية السوفت وير على المواصفات هذني و بتكلفة انتاج رخيصة حتى تزيد ارباحها.
بحيث مؤتمرات أبل تكون عبارة عن ” عوف باقي المنافسين دا يخلون مواصفات زايدة كل الي تحتاج تعرفه انو جهاز الايفون الجديد يجي بمعالج اسرع و كامرة احسن و عدنا لون حلو جديد” والمبيعات مستمرة بدون مشكلة.
الشي الي يخلي أبل تكدر تنتج اجهزتها وتبيعها بهل طريقة يرجع لعدة اسباب الاول انو أبل عدها نظام خاص بيها ومعالجات خاصة بيها مختلفة عن الباقين يصعب عملية المقارنة، السبب الثاني انو الشركة عدها قاعدة جماهيرية كبيرة مستعدة تشتري الجهاز اول مينزل بالاضافة الى النظرة الاجتماعية الي سوتها الشركة بالتسويق الي خلت اغلب المشاهير يستخدمون هل اجهزة. بهل طريقة مستخدمين أجهزة أبل كل الي يحتاجون يعرفوه انو الجهاز اسرع وكامرته احسن من القبلة حتى يختار ياجهاز يشتري.
