كل سنة تنزل مئات الهواتف الجديدة للسوق العالمي بكثير من الخواص تجذب الكثير من الناس
والكل يبقى بحيرة الانتقال الى احد هذه الاجهزة فحتى تعرف الاجهزة الجديدة يستاهلن تبدل جهازك الحالي منهن او لا
فلازم اول شي تخلي ميزانية تبديل مثلاً اذا كنت تشتري الجهاز الجديد بدون بيع الجهاز القديم فكم تحتاج حتى تكدر تشترية
او اذا كنت تريد تبيع جهازك القديم وتكمل المبلغ وتشتري جهاز جديد
فبعد ما حددت ميزانيتك والمبلغ العندك
لازم هسه تعرف انو الجهاز الجديد شنو تريدة يسوي مثلاً
1- جهاز مخصص للالعاب
فحتى تكدر تشتري جهاز مخصص للالعاب تحتاج جهاز شاشتة كبيرة و بطاريتة كبيرة و معالجة قوي و الذاكرة العشوائية كبيرة
يعني مثل جهاز بلاك شارك 2 المخصص للالعاب او جهاز اسوس روج
او احد اجهزة الفلاك شب الخاصة باي شركة مثل عائلة الاس والنوت لسامسونج
والايفون الخاص بابل
والميت والبي الخاص بشركة هواوي او حتى الهونر
2- جهاز مخصص لالتقاط الصور والتعديل عليها
اذا كنت تحب التقاط الصور فراح تحتاج شاشة ممتازة وكاميرا ممتازة وذاكرة كبيرة نوعاً ما
فبشكل مباشر راح تتوفرلك عدة خيارات بدايتها هواتف شركة هواوي ( تعتبر هواوي الافضل في السوق من ناحية الكاميرات )
وبعدها هواتف شركة سامسونج الي تتوفر بيها كاميرات ممتازة وكذلك الايفون
3- جهاز مخصص للتصفح او تنصيب التطبيقات الخفيفة
انت هنا تحب يكون جهازك الجديد جهاز عملي بسعر بسيط يتراوح من 200 دولار الى 400 دولار
فراح تتوجة لاجهزة الفئة المتوسطة الي تقدمها الكثير من الشركات مثل شاومي و سامسونك وهواوي واكيد مراح تلكاها عند ابل
فعندك سلسلة ال Y من هواوي اسعارها تتراوح من 150 دولار لل250 دولار بمواصفات قوية تقريباً مقارنتاً بالسعر
وعندك سلسلة ال A من سامسونك الي يكون اسعارها من 300 دولار لل 450 دولار
واجهزة شاومي مثل جهاز البوكو فون او بالجديد K هذا سعرة 300 دولار -420 دولار بمواصفات عالية جداً
4- جهاز بسعر بسيط وبمواصفات بسيطة
يعني مثلاً كانت ميزانيتك 100 دولار فراح تبحث عن جهاز بالعراق نسمية ” يمشي حال ”
مثل احد اجهزة نوكيا او شاومي او سامسونج او هواوي الي تسمى بالفئة الدنيا او الضعيفة
5- تبحث عن هاتف بذاكرة كبيرة
الكثير من الهواتف الحديثة نوفر احجام للذاكرة كبيرة تبدء من 128 كيكا بايت
6- تبحث عن جهاز كاكسسوار للكشخة
فلازم تروح تدور عن اجهزة الفلاك شب الي يكونن اسعارهن غالية ويقدمن مواصفات عالية ايضاً
مثل الايفون والنوت والاس والميت والبي الي ذكرناهن فوك
كل هذني الفوك امثلة مو حصر حتى تتكون فكرة عندك عن شنو امكانية الجهاز الي تريدة
بعد ما صفيت فكرك وعرفت الجهاز الجديد شنو تريد تسوي بيه وصفيت جيبك وعرفت ميزانيتك شكد راح تبدي هسه تبحث عن الجهاز الجديد
شلون راح تبحث عن الجهاز الجديد بدون استعجال
عدنا بموقعنا قسمين قسم خاص بالاجهزة وقسم خاص باسعار الاجهزة
تدخل تشوف الجهاز الي يعجبك وتشوف سعرة حسب السوق الي احنة راح نوفرة الك ونحاول نحدثه باستمرار
اما اذا كنت تبجث عن مواصفات محددة فموقع GSMArena الي يوفر خدمة تبحث عن الجهاز بالمواصفات الي ببالك
تكدر تزورة من هنا
معلومة : اذا كان جهازك جدبد وما مر سنتين على تاريخ نزولة ماكو داعي تحدثه او تشتري غيرة
واذا كنت تبحث عن مساعدة تكدر تراسلنا على صفحتنا بالفيسبوك وراح نساعدك باختيار جهازك الجديد من خلال كم سؤال
ودمتم 😀
