في بداية هذه السنة قامت شركة سامسونك بالاعلان الرسمي عن هاتف كلاكسي فولد بس واجهتها بعض المشاكل ويه الجهاز سبب تأخير اطلاقه والجهاز راح ينزل للاسواق خلال هذا الشهر بس حسب براءات اختراع مقدمة من سامسونك يبدو ان الشركة دا تشتغل على النسخة الثانية للجهاز ف شنو هذا وشنو نعرف عنه لحد هسه؟
بالبداية الشركة قدمت 3 براءات اختراع للمكتب العالمي للملكية الفكرية و ل مكتب الاتحاد الأوروبي للملكية الفكرية الاجهزة باول نظرة الهن يبينن متشابهات لكن اكو اختلافات بطريقة فتح الجهاز براءات الاختراع ثلاثتهن تم نشرهن يوم 26 من شهر الثامن لهذه السنة الغريب بالامر انو براءات الاختراع هذني تم تقديمهن لمكاتب الملكية الفكرية يوم 14 من شهر الثامن وبالعادة يتم نشر براءة الاختراع بعد عدة اشهر من تاريخ تقديمها لكن سامسونك قامت بالالحاح على نشرها بعد 12 يوم من تقديمها لسبب مجهول.
حسب التصاميم اللي قدمتها سامسونك الجهاز راح يجي ب 6 كامرات والشركة يبدو انو هي مامقررة بعد طريقة فتح وغلق الجهاز اذا كانت بالطول او بالعرض ويبدو انو هذا السبب الرئيسي اللي خلاها تنشر براءات الاختراع بهل سرعة هاي حتى تشوف ردة فعل السوق وشنو يفضلون طريقة فتح الجهاز.
الى الان ماكو هواي تفاصيل عن مواصفات هل جهاز غير انو هو حيصدر بسنة 2020 ع الاغلب ب ال MWC (المؤتمر العالمي للجوال) اللي راح يكون يوم 24 بشهر الثاني سنة 2020 وراح بدعم شبكة ال 5G وسبب قرب الموعد سامسونك راح تطلق الكلاكسي فولد 1 ببلدان قليلة ومو بكميات كبيرة حتى توفر مساحة كافية بالسوق لجاهزها الجديد.
source: LetsGoDigital
