اختبارات سرعة الاجهزة هي عبارة عن كذبة

صار سنين اشوف بالانترنيت سواء يوتيوب او فيسبوك اختبارات سرعة الاجهزة لمن يخلي جهاز بصف جهاز ويفتح تطبيقات ويحسب الوكت حتى يعرف منو الجهاز الاسرع والاحسن بس ك العادة مو كلشي تشوفه ع الانترنيت صدك وراح اوضح الكم بهل مقالة ليش هل اختبارت غلط وماتقيس سرعة الجهاز.

ك بداية لازم اخلي كم توضيح ضروري اولاً مدا اهاجم اي شخص يصور هل فديوات تصوير فديوات لليوتيوب صعب والتزام وتصوير فديو يخلي الناس تهتم له وتحب تشوفه بعد اصعب ولا عجب هاي الطريقة مال فديوات بقياس سرعة الاجهزة الناس تحبها لان تحسها عبارة عن مباراة و جهازين يتسابقن والشخص اللي يصور يعلق على هل شي يضيف حماس للامر وتحسها مباراة فعلية هيج فديوات الناس تحب تشوفها بصورة عامة وهذا السبب الرئيسي اللي يخلي الناس تشوف لعبة كرة قدم اصلا! ثاني شي اني ما منحاز لأي جهاز و اي شركة محد دافع لي فلوس علمود انحاجز الهم..

وامر اخر ذكرت هواي بالمقالة مصطلح رام اللي هو (RAM) هو ذاكرة الخزن العشوائية للجهاز اللي يتعامل وياها المعالج لتحليل ومعالجة البيانات الخاصة بالتطبيقات والالعاب.

المهم نرجع لموضوعنا هن الاختبارات هذني ليش غلط؟ شو مبينات حقيقية وهو اهم شي عدنا سرعة الجهاز خل نوضح اول شي الاختبارات هذني تتقسم الى خطوتين الاولى الشخص يفتح كم تطبيق واحد ورة اللخ ويحسب سرعة فتحهن وراها يفتر بالتطبيقات ويشوف منو اللي بعدها مفتوحة وياهيه رجعت تحمل من جديد 

خل نحجي اول شي بأول اختبار هو فتح التطبيقات اللي اسمه (App startup time)

هذا الشي يعتمد بشكل كامل على سرعة الادخال والاخراج مال جهاز لان هو ببساطة شيصير من تفتح تطبيق؟ راح يتم نقل التطبيق وبياناته من ذاكرة الخزن الى الرام و سرعة عملية النقل هايه هي سرعة فتح التطبيق ببساطة اذا تجيب هاتف مثل هواوي ميت 8 و هاتف سامسونك نوت 8 هذني الفرق بيناتهن سنتين، سنتين من التطوير بحيث المعالج و كارت الشاشة مال نوت 8 اسرع بهواي من الميت 8 بس اذا تفتح عليهن لعبة او تطبيق راح تلاحظ انو الجهازين يفتحن اللعبة بنفس الثانية!

بس ليش صار هيج ببساطة سرعة الادخال والاخراج الها حد معين لسرعة نقل البيانات من الذاكرة الداخلية للرام حتى تبدأ معالجة البيانات. هاي الطريقة ما تقيس سرعة المعالج ولا سرعة كارت الشاشة هي ببساطة تقيس سرعة نقل البيانات من ذاكرة الخزن للرام لاغير.

بالاضافة لهل شي اكو ببعض التطبيقات والالعاب اللي تشتغل على الانترنيت هذني يعتمدن على سرعة الانترنيت حتى يفتحن ممكن واحد يكول اي بس الجهازين مربوطات على نفس الشبكة اي صحيح بس لمن تطلع هاي البيانات من بيتكم حتى توصل لسيرفر معين انت ماتتحكم شلون يتم ارسال هل بيانات ممكن بيانات واحد من الاجهزة تروح بطريق اخر او عن طريق سويجات ثانية حتى توصل لنفس السيرفر..

وفوك هذا كله اغلب الاختبارات اللي اشوفها يفتحون تطبيق والمحتوى اللي بالتطبيق مختلف! ممكن اكو واحد بيه صورة الثاني مبيه ممكن اثنينهن بيهن صورة بس كل صورة مختلفة و الصورة المختلفة يعني غير حجم بيانات الاختبار ميصير صحيح اذا ما البيانات اللي تطلع هي نفسها في كل مرة!

ببعض الفديوات اشوف انو يكول هاي الشركة الفلانية كلش صابه اهتمامها على الالعاب خل نشوف شلون تشتغل هل لعبة مثلا PUBG MOBILE على هل جهاز بس المشكلة هو مايلعب اللعبة ولا يشوف شكد عدد الاطارات اللي بيها ولا يشوف على يا دقة مشغلها هو ببساطة يفتح التطبيق وراها يطلع منه ويشوف ياجهاز فتح التطبيق اسرع يعني ببساطة قاس شكد سرعة نقل بيانات هل تطبيق من ذاكرة الخزن للرام. اصلا اكو بعض الاجهزة تفتح اللعبة اسرع بس اللعبة اسوء عليه ماتلكه دقة عالية ممكن الضلال مال لعبة ماتم تحميلهن هو ليش اصلا فتح التطبيق اسرع؟ لان حمل بيانات اقل من الجهاز الاخر البيانات اللي مايستخدمها التطبيق مايرجع يحملها مثلا اذا خاصية الضلال و التفاصيل مقللة باللعبة ماراح يتم تحميلهن. التطبيق مايحمل بيانات مايستخدمهن !

كل هذا الحجي الفوك هو على المقارنة بين جهازين يشتغلن على نفس النظام مثلا اندرويد اندرويد

مقارنة التطبيقات بين انظمة مختلفة مثل Android – IOS

هذا شي مختلف بالكامل ماكو اي وجه مقارنة نهائياً لان هن اصلاً تطبيقين او لعبتين مختلفات كلياً صحيح هن اثنيهن اسمهن نفس الشي مثلاً اثنينهن اسمهن انستاكرام لكن بالحقيقة هن تطبيقات مختلفة بشكل كامل لان هل تطبيقات تم كتابتهن بواسطة فرق مختلفة بلغات برمجة مختلفة وحتى بمميزات مختلفة ممكن تشوف خاصية على تطبيق بنظام معين ماموجودة ع النظام الاخر لان ببساطة الفريق اللي سوه التطبيق للاندرويد مختلف عن اللي سوه التطبيق للايفون وبعدين يلا يتم نقل هذني الخصائص للنظام الاخر. شلون التطبيق يحمل البيانات شلون التطبيق يعالج عمليات الكاشنك (حفظ البيانات الوقتية) شلون يتفاعل التطبيق ويه ذاكرة الجهاز كلها اشياء مختلفة بالكامل. احسن لك تفتح تطبيق انستكرام على جهاز وتطبيق تويتر على الجهاز الثاني وتقارن لان هن بالحقيقة بكل الاحوال تطبيقات مختلفة بالكامل مدام النظام مختلف..

وبالنسبة للجزء الثاني من الاختبار

اللي هو اختبار الذاكرة لمن تفتح التطبيقات وراها تطلع منهن تروح لغيرهن وراها ترجع لهل تطبيق وتشوف منو اللي بعده فاتح التطبيق ومنو اللي رجع يحمل من جديد هذا ببساطة دا تقيس شلون الجهاز يقرر يتحكم بالرام مالته بس انت ماعندك تحكم بهل شي ابداً! انت ما تتحكم ب شلون الجهاز يقرر شنو التطبيق اللي يطردة من الرام حتى ينطيه ل اللعبة او التطبيق اللي فاتحة كل جهاز يتعامل ويه هل شي بطريقة مختلفة لان ببساطة التطبيق مامحسب انك راح تفتح لعبة وراها مباشرة تطلع منها تفتح الالبوم وراها تطلع منه مباشرة تفتح لعبة لخ وراها تروح لتطبيق لخ ومحد يستخدم جهازة بهل طريقة تره الصراحة انت لمن تفتح تطبيق راح تبقى بيه وراها تطلع منه تروح لغير تطبيق هم تبقى بيه مو تطب وتطلع من كل تطبيقات جهازك بنفس الثانية محد يسوي هيج تره.. مثلاً اذا عندك اثنين كلت الهم اركضوا 10 كيلوات وراها اكو سيارة بالنهاية اخذوها وروحوا لفلان منطقة واول واحد يوصل هو الفايز ممكن واحد منهم راح ركض بكل سرعته ركب السيارة و علك بالازدحام والثاني راح يتمشه واخذ السيارة بطريق ثاني ومالزمه ازدحام ف الثاني فاز مو منطق هذا تره ولا طريقة اختبار لسرعة الاجهزة.

الملخص

الطريقة الوحيدة لقياس الاداء الحقيقي والفعلي للاجهزة هي عن طريق Benchmarking وراح نشرح هل شي بمقالة ثانية وهي هاي اصلاً بيها عيوبها ومرات تكون انحيازية ف ب الملخص اختبار سرعة الهاتف عن طريق فتح التطبيقات لايعتبر اختبار فعلي ل اداء الجهاز ولا يمكن اخذه ك دليل عملي ل اختيار وتحديد الهاتف الاسرع.