fbpx
الاخبار

ماهو ال VPN وهل يحمي كل بياناتك بالفعل؟

على طول هل سنين سمعت الناس وبعض التقنين يكولون كل اللي تحتاجة حتى تحمي بيانات تصفحك بالانترنيت هو انك تنصب VPN اللي هي اختصار ل شبكة خاصة افتراضية زين هو شنو الVPN اصلاً وصدك يحمي كل بياناتك؟

ال VPN يأمن بيانات تصفحك عن طريق ارسال هل بيانات بنفق مشفر (encrypted tunnel) و ينطيك عنوان اي بي (IP) مختلف عن عنوان ال IP الحقيقي المواقع والخدمات ماتعرف عنوان ال اي بي الحقيقي مالتك طريقة صياغة هل حجي يحسسك انو كل اللي تحتاجة حتى تكون أمن على الانترنيت ومحد يعرفك هو تنصب VPN بكل بساطة لكن دائماً الحقيقة مختلفة ال VPN مايكدر يسوي هيج بسبب انو الشبكة مال انترنيت مبنية بطريقة تمنعة انو يسوي هيج مزود ال VPN مالتك يكدر يشوف (كلشي) انت فاتحة ويكدر يقرة كل بيانات تصفحك على الانترنيت والشي الوحيد اللي يمنعة من ان يبيعها او يستخدمها هو (وعد) مزود ال VPN مالتك يوعدك انو ماراح يكشف هل بيانات ولا راح يبيعها او يستخدمها.

بس لنفترض انك لكيت مزود VPN موثوق وبياناتك بأمان يمه تره  عنوان ال IP هو جزء بسيط من طرق التتبع الموجودة على الانترنيت ف نكدر ناخذ على سبيل المثال اغلب المواقع تستخدم كوكل أناليتكس (Google Analytics) بهل طريقة حتى اذا انت مسجل خروج من حسابك بكوكل ومستخدم VPN هل خدمات ماتحتاج الى دقايق من تصفحك ع الموقع حتى تعرف حقيقتك وتربطك بحسابك الاصلي فهي ببساطة تجمع ( بعض من تاريخ التصفح، ملفات تعريف الارتباط او مثل مايسموها cache cookies، اعدادت المتصفح مالتك، اعدادات جهازك، بطارية جهازك، دقة شاشتك)

وفوك هذا كله اكو ادوات التتبع المتطورة هذني يسون كود تعريفي الك يسموها مرات (advertising IDs) هذني تحصلهن من تسجل بخدمات مثل كوكل، مايكروسوفت، ابل، فيسبوك هذني الاكواد مو وهمية هذني ينربطن برقم تلفونك، معلوماتك البنكية اذا مدخل فيزا كارد بواحد من حساباتك، عنوان بيتك الحقيقي اذا جنت كاتبة بهل خدمات، هذني يكدرن يتبعن كل نشاطاتك على الانترنيت وهذا الكواد بعض الموقع تكدر تشوفه اصلاً شايف لمن تبحث بكوكل عن شي معين مثلا علاج او دا تريد تشتري لك جنطة تروح للفيسبوك تلكه اعلانات جنط تروح لل انستاكرام تلكه اعلانات جنط تروح لليوتيوب تلكه اعلانات جنط بحيث بكل مكان حتشوف هل شي اللي انت بحثته بمكان واحد.

اخفاء ال IP مالتك ماراح يسوي اي شي حتى يحجب ادوات التتبع هذني وبالموبايلات اصلا مامنة فايدة نهائياً لان انت اغلب الاحيان فاتح ال GPS او فاتح نت على الشريحة وهذني بكل بساطة يكشفن موقعك الحقيقي بس الصوج من سوء الفهم هذا مو صوج الناس السبب الرئيسي مزودي ال VPN نفسهم بطريقة تسويقهم للمنتجات مالتهم يكولون الك خدماتنا تخليك مخفي من الشبكة محد يكدر يتعرف عليك و يخلون رسوم توضحية مبسطة الى اكبر قدر ممكن تحسسك انو هي هاي حقيقة الشبكة وانك من صدك صرت مخفي.

لكن ببساطة ال VPN صار نقطة حمايتك الوحيد بحيث اذا تم تهكير خدماتهم ممكن كل بياناتك ومعلوماتك تتسرب بكل سهولة و الدول تكدر ببساطة تروح على مزود ال VPN وتخليه ينطيها كل البيانات الخاصة بالمستخدم او تجبره يسجل كل بيانات هل شخص اذا المزود ماجان يسجل مسبقاً 

مزودين ال VPN مايجذبون من يكولون لك بياناتك تتشفر بشكل كامل ومحد راح يعرفك بس على يا بيانات يقصدون ببساطة يقصدون ع البيانات من حسابتك او موبايلك لسيرفر مزود ال VPN يتم تشفيرها لكن بعد ما توصل للسيرفر يتم فك تشفيرها وارسالها للموقع هذا شي لازم! لان اذا يبقوها مشفرة شلون الموقع يكدر يفهمها؟ هاي الطريقة مفيدة اذا تريد تحمي بياناتك من شخص دا يتجسس على بياناتك عن طريق شبكة الواي فاي الخاصه بيك ال VPN يحمي بياناتك اي بس ما يسويك مخفي بشكل كامل لان هذا المنطق نفس ما نكول اذا تلبس سترة مضادة للرصاص ماراح تموت…

الملخص:

ال VPN مو حماية وكالة الأمن القومي ولا راح تصير هيج ببساطة يكدرون يتبعون الوكت بين ارسال بياناتك و وقت ارسال البيانات من ال VPN ويعرفون هويتك واغلب شركات ال VPN اذا اجاها طلب حكومي لتسليم بيانات ال VPN الخاصة بشخص راح تسلمها مباشرة و ادوات التتبع اللي يتم تنصيبها من قبل الخدمات اللي تسجل بيهن مثل فيسبوك وكوكل الخ.. تبقى بجهازك حتى اذا سجلت خروج ولازم تمسحها بشكل يدوي بس هذني الخدمات ماتكدر تعتبرهن شيء سيء وانو هم يستخدموهن بس حتى يعرفون بياناتك ويعرضون لك اعلانات مستهدفة هذني يسمحن للشركات تقدم لك الخدمات اللي تريدها والاقتراحات اللي تناسبك وتقدم لك افضل تجربة ممكنة لمواقعهم.

تنصيب VPN هو الخطوة الاولى لجعلك مخفي من الشبكة لكن اكو اكثر من 50 خطوة وراها… ال VPN يفيد بأن تتجاوز حظر من الدولة ع موقع او خدمة معينة، يكدر يحمي بياناتك من تتصفح الانترنيت على شبكة واي فاي مفتوحة بأماكن مزدحمة هل شي اللي دائما احذر منه بسبب خطورته ال VPN يكدر يحمي بياناتك من هذولة بس

(ال VPN مايسويك مخفي من الشبكة انت بكل الاحوال يتم تتبعك ماتستاهل تشتري خدمة VPN بنية ان تكون مخفي ع الشبكة اكو هواي امور ثانية)

هنا بعض المصادر لهل كلام

1 2 3 4

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق