fbpx
الاخبار

شنو فائدة تحديثات الامان (security updates) ؟

كلنا مارين بهل حالة من يجيك تحديث لموبايلك تحمله وتنصبه وراها تلاحظ انو ماكو اي شي اختلف بالجهاز شنو فايدة هل تحديثات وليش الشركات تدزهن؟

تحديثات الامان (security updates)

اي برنامج او كود ينكتب لازم يكون بيه اخطاء او حسب ما يسموها المبرمجين (bugs) والعمل الرئيسي لمهندس البرمجيات هو محاولة تقليل هذه الاخطاء الى اقل قدر ممكن. الاخطاء هذني يتم حلهن بطريقتين اما ايجادهن واصلاحهن بنفس الوكت اللي ينكتب بيه البرنامج او اصلاحهن اول مايكتشفون وجودهن. 

الاخطاء هذني نكدر نقسمهن الى قسمين: الاول هن الاخطاء اللي يخلن النظام يعمل بطريقة خاطئه فعلى سبيل المثال اذا تكتب بالحاسبة “001.300 * 02.7000” وانطاك الناتج 2.51 وهذا الناتج خطا هاي الاصفار الزايدة خلت البرنامج يخطا بالحساب هذا النوع بالعادة مايعتبر خطير كلش الا في حالات قليلة ممكن تأثر على انظمة المبيعات الالكترونية.

النوع الثاني هن الاخطاء الي تشكل خطر على امن الجهاز مثل تطبيق يطلب منك تسجيل الدخول ممكن خطا برمجي يخليك تكتب بس اسم المستخدم صحيح بدون ماتكتب الباسورد ويخليك تدخل للبرنامج بنجاح (هذا الشي صار قبل بالحقيقة مو بس مثال) بس هذا مثال كلش بسيط عن هاي الاخطاء بالعادة هذني الاخطاء يكونن معقدة بشكل اكبر بهواي وذات خطورة كلش عالية لان الهاكر ممكن يوصل لبياناتك الخاصة بدون مايكتب باسوردك اصلا.

اكو ببعض الحالات النوع الاول من الاخطاء ممكن يتحول بواسطة الهاكر الى النوع الثاني ويأثر على امن الجهاز. بعد ماتحمل هل تحديث وتنصبه راح تلاحظ انو ماكو ولا شي تغير بس هي هاي الفكرة هاي التحديثات تصلح ثغرات بالجهاز انت ماتدري بيهن اصلا على سبيل المثال وحدة من الثغرات انو رسالة SMS متكونة من 160 حرف بالضبط باللغة الكورية والروسية تسبب خلل بدفاعات الجهاز تسمح للهاكر انو يدخل على الجهاز ف انت شكد نسبة تجيك هيج رسالة على موبايلك؟ وحتى اذا اجتك ع الاغلب راح تمسحها ولا تدري شصار على جهازك.

شنو الاجهزة اللي تجيها تحديثات امنية ؟

كل الاجهزة لمن تشتريها وياها دعم لمدة سنتين تحديثات امنية طريقة عمل هاي التحديثات انو شركة كوكل تصلح الاخطاء اللي تلكاها بنظام الاندرويد وراها تبلغ الشركات المتعاقدة وياها مثل سامسونك وغيرها ب أنو نزل تحديث امني جديد كوكل تنشر هل تحديث كل شهر الشركات تجي تصحح هل ثغرات الموجودة بنظامها وتبثه لكل اجهزتها. 

الخلاصة

التحديثات الامنية هي شي ممل بالنسبة للمستخدم فهي مثل ما انك تسوي نسخة احتياطية لكل ملفاتك حتشوف هل شي ممل ومضيعة للوقت لحد ماتفقد كل بياناتك يلا تحس بالسالفة ف التحديثات الامنية نفس الشي اغلب المستخدمين ما يفكرون بأمن اجهزتهم وحساباتهم لحد مايتم تهكيرهم وسرقة بياناتهم الخلاصة من يجيك تحديث امني نصبة وتذكر هل مقالة واعرف انو اكو ناس دا تشتغل على حماية تلفونك.

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق
إغلاق